太平山街剛試業嘅新店 Goose’ Chocolate，前身係西營盤嘅咖啡店 Half & Half，舊店結束後店主另覓新地點，現進駐太平山街更方便，更將舊店極受歡迎嘅朱古力元素變成焦點。
店名索性以 Chocolate 為題，而叫作 Goose 是因為可愛嘅鵝公仔，亦取「good」的諧音，寓意要製作優質嘅朱古力。
新店以復古調子嘅綠色為主，飾以古董燈、掛簾、木櫃子、皮椅、大量有趣可愛嘅鵝、貓裝飾品，更不時有貓店主坐鎮，每個角落也叫人歡喜。
飲品方面有咖啡，但朱古力才是重點，招牌嘅 Goose’ Chocolate ($65)用 Tanzania 73% 可可製作，帶有車厘子、烤杏仁嘅風味，略有莓果嘅酸味，加入適量嘅奶去煮製，再撒上可可碎，質感 creamy 卻沒有太膩。
另一必試推介係 Chili & Pepper Chocolate（$75）比起原味嘅朱古力飲品會更濃稠，以黑椒碎粒引出辛辣層次，一試難忘，其他飲品包括可可 lemonade、朱古力香蕉 smoothie及一般咖啡。
甜品類不可錯過朱古力布甸（$58）將日式嘅雞蛋布甸變成朱古力味，其嫩滑程度有入口即溶嘅感覺，伴以忌廉及焦糖汁，各種味道及質感融為一體。
鹹食有 Goose’ Breakfast（$128）有香草 focaccia 麵包、火腿、流心蛋、生果乳酪、沙律等，伴一杯朱古力，是非常豐富嘅全日早餐呢。
地址：上環太平山街 16 號
時間：11am – 6pm ，星期一、二休息
