呢間以山林為主題嘅全新 Omakase餐廳「山」，充滿天然光及滲透文青簡約風嘅設計，食材講究就連賣相都係驚喜十足。用上大量煙霧效果去配合山林主題，歎一頓高質嘅日本菜之餘仲可以滿足打卡。
餐牌有六款主題嘅 Omakase，分別為「山の御膳」以及用不同食材做主題嘅蟹、和牛、海之幸、魚、雞。「山の御膳」（$1,688）結集十道美饌，包括日本雲丹拼盤，共有 5 種不同產地嘅海膽，分別有宮城、岩手、浜中町、根室等，每款佐以三文魚子、魚子醬等新鮮食材，更襯托出海膽嘅鮮味。
還有廚師發辦前菜、蝦夷鮑酒蒸、刺身五款、壽司五款、A4 宮崎牛厚燒等，特別要留意特濃上海蟹拌後文稻亭，用大閘蟹蟹膏及蟹油，伴以松葉蟹蟹芡及稻亭烏冬，每一口也極為濃郁。附上十年意大利黑醋，撒一點黑醋吃更平衡而突出鮮味。
另一推介有九道菜嘅「蟹 Omakase」（$1,388），毛蟹柚子啫喱、釀大閘蟹蟹蓋等也是啖啖蟹味，就連當中嘅蟹湯都花足心機，以蟹蓋去熬製，伴以日本山葉及柚子皮，將鮮、濃、清、酸嘅味道集於一身。
意想不到嘅驚喜係甜品，和風鮮果雪糕拿破崙，此拿破崙嘅做法來自一間日本甜品店，店員介紹此甜品店嘅拿破崙曾經獲得世界獎項，吃一口果然係鬆化酥脆，伴以京都士多啤梨、椰子雪糕，多點清新點綴。另有價錢較相宜嘅午市 omokase，由 $368 起就可以試到各款時令食材及精緻料理。
餐廳室內設計加入大量淺木質材、山巒線條，就連筷子托、餐桌佈置也是特別打造，更設有一個露台眺望跑馬地景致，十分舒適。如此 Omakase 一改傳統幽暗靜肅嘅氣氛，視覺與味覺都非常滿足。
地址：銅鑼灣耀華街38號 The Zing 15樓
電話：3795 6310
