朝啡晚酒已不是新鮮事，中環呢間全新嘅餐館咖啡店 mato 走得更前，以創新嘅「啡酒發辦」概念模式，令客人可以有更個人化嘅咖啡及葡萄酒體驗。
團隊有經驗豐富嘅侍酒師及咖啡師，按着客人嘅喜好及用餐選擇相介咖啡及葡萄酒。咖啡引入丹麥知名品牌 April 嘅咖啡豆，而酒單則有超過 150 款葡萄酒，侍酒師甚至有私藏嘅酒品或與客人分享。
Mato 更推出葡萄酒 all you can taste（$350），可於兩小時內任飲 6 款指定葡萄酒，每款來自不同產區、年代、備有各有特色嘅風味，而 6 款任飲葡萄酒會每個月轉換，讓客人可以試到更多款式。
食物款式有小食、意粉及自家製嘅 gelato，意粉嘅食材配搭甚有驚喜。「叉燒」（$130） 用上 carbonara 醬汁作基調，配以慢煮 6 小時嘅日本豬腩肉，伴着溫泉蛋、自製乾蔥芝麻汁。「蟹」（$210）天使麵拌以意式 Alfredo 醬汁，配搭手拆蟹肉及蟹膏麵豉，兩款意粉都帶有日式風味。
另一款「牛肉」（$240）則用熬煮兩日嘅牛骨濃湯，加入紅酒將牛小排燴煮 3 小時，肉質軟腍入味。
想伴酒也有多款特色小食，「白飯魚薯波」（$75）在薯蓉球外沾滿白飯魚及鯷魚炸至香脆，另有手打黑格斯牛丸，薯條等香口下酒小吃，而自家製嘅 gelato 則有番茄、芝士、咖啡等有趣嘅口味。這店嘅體驗比一般嘅 café 餐廳更難忘更有趣。
地址：中環德輔道中173號Nan Fung Place地下G02號舖
營業時間：11am-11pm
