糖廠街市集已轉新地點！已舉辦多次的太古坊糖廠街市集最新一輪市集及新餐車剛開始！但留意返市集已轉換地點，唔再喺以前糖廠街尾地面位置，新位置喺英皇道轉角德宏大廈 1 樓平台花園，地點更方便而自成一角！
今次新進駐嘅餐車包括麵包名店當文歷餅店，身處港島東都可以食到世界名廚 Dominique Ansel 嘅麵包，除咗經典嘅甜酥麵包系列，品牌更於糖廠街市集推出三款獨家美食。「咖喱素牛牛油軟包三文治」（$58）將 brioche 做成長包造型，以甘筍片、日式咖喱慢煮洋蔥伴着素牛肉丸餡，味道豐盛香甜。
「新桂香叉燒忌廉湯通粉」（$78）選用超過 40 年歷史嘅柴灣老字號新桂香燒臘出吅嘅叉燒，每日新鮮出爐燒得甘腴鬆化。「朱古力燕麥奶曲奇杯」（$48）用咗 Oatside 朱古力燕麥奶，注入肉桂味曲奇杯，將此品牌最受歡迎之一嘅打卡美食變成朱古力燕麥版本。
同期另一注目餐車 pop-up 係嚟自炮台山嘅「魚事者」，以魚肉作主打製作出多道新派有趣嘅菜式，多款小食類十分吸引。「炸魚無薯條」（$35）將魚肉製成長條狀再炸脆，外形睇落似薯條，長落有魚肉嘅彈牙質感。
「魚肉燒賣」（$20/8粒、$12/4粒）分別有原味、芫荽及陳皮味。「炸魚狗腸」（$28）將魚餅炸香再配上醬汁及木魚花等，每一口也十分香濃。現場食完仲可以買走「手工魚辣醬」（$48），有香郁嘅大地魚滋味，由店家自家手工製作，返屋企再慢慢歎。
地址：鰂魚涌英皇道 979 號太古坊德宏大廈 1 樓
時間：星期一至五 8am-3pm
