呢間喺荔枝角嘅麵包店「Doughman」只係開咗兩個多月，以西式麵包作主打，酥皮類嘅麵包、貝果、酸種麵包、Focaccia、肉桂卷等，仲有埋咖啡機可以 order 各式外賣咖啡。
平日不同時段經過此店都係人流不斷，店面及室內設計簡潔而帶點歐陸小店風格，室內整齊放着大大包嘅麵粉，原來其中一位店主兼大廚曾經喺港島香格里拉酒店內任職麵包師傅，堅持選用日本麵粉、法國牛油等優質原材料，質素高亦維持到水準。
牛角包 ($18) 每個切開都見到蜂巢層次，酥皮麵包款式仲有杏仁牛角、朱古力牛角、丹麥酥等。
麵包控必食仲有各款貝果，每件形狀均勻又脹卜卜，入面均包裹滿滿嘅餡料。芝麻味及抹茶紅豆麻糬 ($24) 最受歡迎，黑芝麻餡料塞滿貝果之內，貝果本身夠煙韌而餡料有軟糯及麻糬柔韌口感，作為早餐、下午茶或午餐輕食也十分滋味！
地址：荔枝角長義街 10 號昌隆工業大廈地下
營業時間：星期一至五 7:30am – 8pm、星期六 8:30am-8pm、星期日休息
