日本菜又邊只得壽司、拉麵？尖沙咀就間有新開鐵板燒餐廳N.28 TEPPANYAKI，走高檔路線，用料上乘矜貴，包括香港少見嘅米澤和牛、蝦夷鮑魚等。
餐廳裝修走型格路線，一入門口就見到長型吧枱，客人可以一邊用餐，一邊欣賞廚師炮製鐵板燒。鐵板燒菜式帶點西日fusion，午市套餐最平$188落樓，有齊鐵板燒菜式、沙律、蒸蛋、麵豉湯同甜品，不過最精彩都係要食返個全餐。
想食得豪啲可以揀金賞米澤和牛鐵板套餐/$1,680位，米澤和牛嚟自日本山形縣，係三大和牛之一，同松阪牛、神戶牛齊名。佢油花分布平均，肉質細緻，肉味特別香甜，產量唔多，所以非常珍貴。
套餐前菜之一就有米澤和牛他他配海膽，淡淡和牛油花香，配以海膽鮮甜。套餐仲可以食到薄燒同厚燒嘅米澤和牛，和牛入口即化，令人回味不已。
另一個推介有日本蝦夷鮑魚鐵板套餐/$1,480，精選鮮活日本蝦夷鮑魚，肉質厚實而柔滑富彈性，最適合作鐵板燒。配以青森縣海苔醬，鹹鹹香香突出鮑魚鮮味。
地址：尖沙咀棉登徑28號錦榮商業大廈地舖
營業時間：12pm-3pm; 6pm-11pm
