尖沙咀呢間新開嘅鐵板燒「夜」走全黑色風格，室內設計用上黑色主題，配以鏤空吊燈營造出型格嘅光影效果。店內每個鐵板燒區都可劃分成獨立廂房用餐區，與朋友用餐嘅空間嘅舒適自在，亦可以與鐵板燒廚師有更多交流。
駐店鐵板燒主廚來自高級酒店鐵板燒餐廳，製作菜式嘅功架十分純熟，食材選料高級像西澳龍蝦、A4宮崎和牛等。更難得菜式有新意，將創新做法融入傳統鐵板燒，令味道昇華之餘過程亦更有趣。
像A4宮崎和牛，於鐵板上火炙過後，放上已預先燒紅嘅備長炭，再於炭上撒上日本茶葉，蓋上蓋子達至煙燻效果。另一道匈牙利鵝肝，於鐵板上放置櫻花木，將肥美鵝肝煙燻，獨特香郁嘅木香平衡了鵝肝油膩感。喜歡吃牛肉嘅話仲有關西風和牛壽喜燒，於鐵板撒上砂糖再鋪上大片薄身和牛，有焦糖化嘅甜郁味道。
海鮮類別有南非鮑魚、鱸魚等，餐廳花心思自家熬煮各款口味嘅醬汁去配搭，整個體驗不只一解日本鄉愁，亦可感受到餐廳及廚師嘅誠意。
餐廳備有午市及晚市套餐，午市八道菜 $298 起就可以淺嘗鐵板燒滋味，晚市套餐 $1288 起，A4宮崎和牛及和牛壽喜燒可於套餐追加，各款選擇豐儉由人。
地址：尖沙咀山林道 17-19 號地下
電話：5331 3978
