置地文華東方酒店入面有間法式小酒館SOMM，走casual dining路線，都有唔少人鍾意嚟食下野飲返兩杯。唔講唔知原來餐廳有賣早餐，仲每日7:30am已經有得食，而且食物質素仲非常高質。
餐廳佔地不大，勝在私隱度高，唔趕時間可以慢慢嘆返個悠然早餐，定價$318一份嘅早餐，聽落有啲拿利，但對應返食到係六星酒店出品，可以話係用入門價錢就試到。重點係早餐內容一啲都唔馬虎，可以自選鹹甜主食，跟一款配菜，跟咖啡、茶或果汁。
主食大推牛油沙巴翁水煮蛋配脆米餅，脆米餅係用米飯煎香做到好似pancake咁，牛油沙巴油汁食起嚟有啲日式風味，上面仲灑咗木魚花，食落好有驚喜。其他主食仲有比利時窩夫配香腸、煙肉及楓糖漿，法式多士配新鮮士多啤梨及酸忌廉。
唔怕一早就飲酒？咁仲可以加多$120 升級SOMM Bubbly早餐，除咗享用Nicolas Feuillatte NV 香檳一杯，鹹甜主食仲會女變成各自選一款，啱晒想心思思試勻嘅朋友。
地址：中環皇后大道中15號置地文華東方酒店7樓
早餐時段：7:30am – 10:30am
