Shabushabu未必任食先係滿足！牛陣最近就喺銅鑼灣世貿中心開設高級副線「牛陣HANARE – Platinum Label」，清新簡約嘅裝修甚有日本侘寂(wabi-sabi) 美學之感，灰杏色、木系傢俬配以綠色植物，成個感覺煥然一新，果然係唔同！
新餐廳唔再係玩任食，而係走高檔路線，主打套餐。牛魔王必選鹿兒島A5和牛套餐（$689位），有4款湯底揀：鰹魚、番茄豆乳、真鯛魚同壽喜燒，推介用紙火鍋盛載嘅鰹魚湯底，清甜美味兼又靚之餘，紙火鍋實際有助吸收油脂雜質。
8道菜嘅火鍋套餐份量豐富，打頭陣有季節前菜四品，有磯煮鮑魚、雲丹炙燒帆立貝、和牛他他同醋漬番茄，至於涮涮和牛就有肥美嘅澳洲和牛舌、鹿兒島和牛赤身配海膽同A5和牛西冷，和牛西冷軟綿綿入口即化。
鍾意食菜嘅見到豐盛嘅野菜盛合會超級開心，挑選多款本地有機新鮮菇菌同水耕菜，夠晒營養均衡啊！套餐另外仲有和牛火炙壽司、雜炊同甜品，就算唔係任食都一樣飽上頸。
除咗和牛套餐，餐廳都有推出海鮮涮涮鍋套餐（$689位），配上日本直送精選海鮮，而午市亦都有一人用嘅鹿兒島和牛赤身套餐（$179）。
地址：銅鑼灣告士打道 280 號世界貿易中心 11 樓 L11-02 號舖
營業時間：Mon-Thu: 12pm-3pm; 5:30pm-10pm & Fri-Sun: 12pm-3pm; 5:30pm-10:30pm
