聖誕諗好去邊食餐好慶祝未？又唔一定要揀旺區嘅，九龍城就有間高級日本料理「三和敘」，餐廳獨立一幢，樓高五層，結集傳統日本料理三大菜式：壽司、鐵板燒、爐端燒。每層都有一個主打，食到專門嘅廚師發辦，另外再加兩層做VIP房。
餐廳最近推出冬日創意嘗味餐單/$1,480位，八道菜餐單可以試勻壽司、鐵板燒、爐端燒，仲用咗北海道螃蟹、澳洲龍蝦等時令高級食材入饌，適逢餐廳四周年 12月內惠顧每兩客套餐，仲送海膽白蝦杯一個，大大杯超滿足。
前菜有松葉蟹肉水雲醋伴新鮮鮭魚子，清酸開胃，季節壽司三點有：備長炭炙燒寒鰤魚、醬油淺漬熟成本鮪中腹，同埋北海道牡丹海老配馬糞海膽，三款壽司都相當有驚喜。
天氣凍，師傅都好細心咁幫大家諗埋，食完壽司前菜上返個北海道毛蟹花膠羹，熱辣辣用迷你砂鍋奉上，暖入心頭。跟住有海鮮菜式鐵板松茸瀨尿蝦伴鮟鱇魚肝醬，同埋炭燒活龍蝦伴龍蝦汁，分別用鐵板燒同爐端燒方式做，各有風味。
日本熊本牛柳就用咗A5級和牛，鐵板煎香，可以配搭炸日本獨子蒜片、鹽昆布、金山寺味噌同埋香草海鹽。最後食埋個松葉蟹肉天使麵配蟹濃湯同甜品日本年糕伴紅豆湯、薑汁雪糕，真係飽到上心口，不過就超滿足！
地址：九龍城福佬村道 46 號
營業時間：12pm-3pm; 6pm-10pm
