PMQ 咖啡市集今日開始喇！第七屆 PMQ Coffee Agenda 由今日起至 11月 6 日舉行，場內集結超過 20 個咖啡品牌，備有各式各樣嘅咖啡體驗、分享會、工作坊，當然唔少得各款飲品、咖啡相關美食及產品。即刻睇下有咩重點推介！
大安茶冰廳將歷史悠久茶冰廳改造嘅 café 人氣滿滿，今次參與咖啡市集貫徹其茶記元素，檔口帶有懷舊設計元素。各款曲奇、玻璃樽裝咖啡、砵仔糕都好味又打卡，必試每日自家新鮮製作嘅蛋撻，曲奇撻皮嘅高身蛋撻，一咬開即有流心嘅焦糖餡。
今年首度發佈多項新品嘅 Coffee Now Today 與本地人氣品牌 Lo Chen Bakery 合作推出曲奇，特別選用由 O-Farm喺香港本地種植嘅咖啡果實，以鹹酸菜醃漬過嘅咖啡果皮，將果皮磨碎用以製作牛油曲奇，酥化質感又食到啖啖鹹鮮餘韻。
另外有同精品茶店「想爺爺了」合作推出嘅橙桂花咖啡葉茶，以類似製作白茶嘅方法處理咖啡葉，沖泡出帶有橙桂花及咖啡葉嘅香氣。Coffee Now Today 更推出以咖啡渣做嘅襪子，真正嘅咖啡迷不可錯過。
Blossom將 café 嘅招牌甜品 tiramisu 帶到嚟市集，流心質地嘅忌廉醬，滿有咖啡香嘅 tiramisu 作為送咖啡嘅甜品無可挑剔，仲有靚拉花咖啡、冷萃咖啡、batch brew 等。
Hidden Figures 人氣唧唧朱古力醬凍飲喺市集都有供應，自家品牌嘅咖啡豆選擇不少，同場有新發佈、香港自家釀製嘅「一瓢」咖啡酒，用 Kenya 咖啡豆加冧酒製作。
整個市集仲有更多咖啡產品及活動，主辦單位早前公開徵集本地咖啡烘焙師，並由專業評審揀選其中三位，推出咖啡豆套裝，喜歡精品咖啡嘅話一定要試！
想學下咖啡調酒，可以參與由香港咖啡調酒大賽 2022 冠軍得主 Hasting 嘅分享教學，分享心得之餘亦會即場示範製作得獎作品，更多詳情資料可到官方網站了解：https://bit.ly/pmqcoffeeagenda22
地址：中環 PMQ 元創方地面廣場
日期及時間：11 月 3 日 4-7pm，11 月 4 至 6 日 11am-7pm
