Bakehouse 剛推出一系列聖誕節麵包新品，有爆餡又有造型可愛嘅款式，一共 8 款，即刻同大家逐件拆解係咩口味！
栗子焦糖麵包（$42）圓碌碌脹卜卜嘅冬甩面層撒上烤過嘅榛子及海鹽焦糖醬，撕開冬甩係十分鬆軟嘅麵包質感，內裏唧滿爆餡嘅栗子忌廉，每一口都有軟滑又有堅果脆粒口感。薑餅人（$22）混入薑餅香料嘅酸種酥皮，可望見分明嘅酥皮層次，外層有凝結嘅晶瑩糖粒，更添加脆卜卜嘅口感。
黑森林丹麥酥（$52，銅鑼灣店限定）將傳統黑森林蛋糕嘅元素放到酥皮甜包之中，於丹麥酥上有黑車厘子果餡、雲呢拿 mascarpone 芝士，再撒上黑朱古力碎及綴以一顆飽滿嘅黑車厘子，甜美果香及滑溜嘅芝士忌廉融為一體。
迷你香蕉圓型蛋糕（$38）將香蕉牛油蛋糕做成小圓形狀，底層沾上黑朱古力醬，面層則是海鹽焦糖醬及山核桃果仁碎，鬆軟又濕潤嘅蛋糕口感十分出色。
酸種百果餡餅（$28）係英國傳統嘅節慶甜點，以 Bakehouse 最受歡迎嘅酸種酥皮做成批底，內裏盛着滿滿嘅乾果餡料，包括以冧酒浸漬過嘅葡萄乾、蘋果及香梨粒。蘋果批曲奇（$20）曲奇內有嘅蘋果、肉桂、丁香餡料，每一啖都係蘋果節日滋味。
酸種意大利水果麵包（$258/原個）源自米蘭嘅意大利甜包，每到聖誕節必定會出現餐桌之上，Bakehouse 加入酸種去製作令味道更有層次，麵包內有白蘭地酒漬葡萄乾及果皮。
國王餅（$388，12月27日起發售），傳統嘅法國甜點以千層牛油酥皮包裹着杏仁忌廉餡焗製，內藏迷小瓷偶，誰吃到就是幸運兒。Bakehouse 此國王餅會另外附上豬仔小瓷偶，讓客人在切餅後才收藏餅內，甜品盛宴同時也是一場小小嘅尋寶遊戲。
地址：銅鑼灣啟超道 16 號地舖/灣仔大王東街 14 號地舖/中環士丹頓街 5 號嘉彩閣地舖/尖沙咀漢口道 44 號地舖/赤柱赤柱大街 116 號地舖
