大角咀向都多平民美食之選，今次介紹位於大全街的嘅日嚐，主打手工日式料理定食，店仔細細，木系裝修帶點家庭式感覺，定價唔貴而且質素相當有驚喜。
全日套餐定最平由$58起，包一款主食、季節沙律同冷盤，可以配稻庭烏冬、蕎麥冷麵或者越光米飯，而烏冬仲可以有三款湯底揀，包括昆布木魚湯、豬骨濃湯同牛骨湯，選擇之豐富都可話誠意十足。至於自選沙律必選柚子紫薯青蘋果沙律，軟滑紫薯蓉夾雜爽口青蘋果，入口清新。
九款定食各有特色，推介慢煮封門柳配自家雜菌燒汁/$98，封門柳煮得軟腍細嫩，雜菌燒汁鹹香惹味，同牛柳非常匹配。脆炸吉列豬扒/$68 係另一款推介，同傳統日式吉列炸法有點不同，只係用上薄薄炸漿脆炸，但同樣鬆脆可口，淋上甜甜燒汁更為美味。
強烈建議大家加$8追加醬油蛋，無論配飯、烏冬、甚至蕎麥麵，都唔會有奇怪感覺，蛋黃充滿濃郁醬油香，將蛋黃戳破，以蛋汁拌飯、麵，都將美味度大大提升，大滿足！
地址：大角咀大全街13號大同新邨地下A號舖
營業時間：11:45am-4pm; 5pm-9:30pm
