鍾意食omakase 又想有啲新花款嘅，可以試下銅鑼灣呢間新開嘅螢雪 Keisetsu，以Fusion Sushi Dining作為主題，結合西式烹調技巧，喺擺盤、上菜方面都極具心思，唔淨只照顧客人味覺上享受，而係整體用餐體驗都充滿不同細節。
餐廳亦特設自家乾式熟成櫃製作熟成魚鮮，包括時令鰤魚、左口魚、吞拿魚等做出嘅刺身、壽司，都更具風味。
午市11貫壽司套餐由$498起，至於晚市廚師發辦一共兩款套餐，$1,580/位嘅鮨相對著重壽司，較適合鍾意傳統omakase嘅朋友。而$2,080/位嘅螢雪除咗壽司刺身以外，更多係特色料理，出色嘅前菜，已經令人相當期待。
打頭陣嘅八寸，有用白子做嘅豆腐，雪糕狀充滿鮮香，配埋千層法式脆薯同鹽燒北寄貝。壽司有以竹葉包裹嘅瀨尿蝦壽司、慢煮六前高田真蠔壽司，即席灑上鹽花，鮮味難忘。
其他菜式仲有風乾金菇剝皮魚、熟成煙燻鰤魚配醬油慕絲、鮟鱇魚肝雪糕配炸沙甸魚苗等，每一道都有心思驚喜，值得翻兜！
地址：銅鑼灣渣甸街 66 號亨環 7 樓
營業時間：12pm-3pm; 6pm-11pm
