天然鮮紫色甜品好吸睛！所講嘅係紫芋 (Ube) 做嘅蛋糕及曲奇，由陳凱琳 (Grace) 與純素甜品店 The Cakery 合作推出，作為 11 月世界純素月嘅限定款式，將由 11 月 4 日起供應至 11 月 14 日。
一向鍾意食甜品嘅 Grace 將自己喜愛嘅 ube，變成是次聯乘嘅主題並與 The Cakery 一起創作，當中必有 Grace 經常自家焗製嘅曲奇，Ube Mochi Cookie ($55) 軟身曲奇中間夾着軟糯嘅紫芋蓉，仲有柔韌可拉絲嘅麻糬，麻糬給予多層口感亦都平衡甜度，不用牛油嘅純素曲奇也做到這口感，十分有驚喜。
鍾意 creamy 口感嘅話就要試 Ube Tart ($70)，拿起紫芋撻即聞到濃郁香芋味，香脆嘅撻底上滿滿嘅紫芋忌廉，唧成精緻優雅嘅紋理。中間是紫芋醬餡，而撻底上另有一層烤焗開心果仁，令撻底有更卜卜脆嘅口感。
限定系列怎少得 The Cakery 最出名嘅 Cupcake？Ube Cupcake ($48)純素雲呢拿蛋糕內有軟糯嘅紫芋餡，面層則有細滑嘅紫芋忌廉，有視覺享受之餘味道也香濃。
想與朋友一齊分享純素滋味，就要揀選 tower cake 造型嘅 Ube Cake ($688/4吋、$1,378/6吋)，以白色及紫色造成對比嘅雙色外形，中間一圈銀箔更添高貴優雅。
整個 ube 系列將於 11 月 4 日起推出，可直接到店中購買也可於網站預訂，供應期有限，甜品控唔好錯過啊。
地址：銅鑼灣利園二期 1 樓 124 號舖/中環置地廣場 3 樓 303 號舖/中環 ifc 商場 1041 – 1049 City’Super 內
