擁有米芝蓮一星嘅中菜廳明閣，推出六道菜大閘蟹宴/$1,338位，即日起供應至11月底，精選肥美太湖大閘蟹，炮製多道鮮香甘美嘅蟹粉菜式，仲有原隻五両大閘蟹。今年蟹季遲咗開鑼，而加先開始係最靚最肥咋！
蟹宴正式開始前，先品嘗魚子醬花雕醉藍天使蝦作開胃前菜。蝦肉爽甜味道特別鮮濃，然後最先有豐富嘅三小碟，蟹粉金菇脆卷、蟹粉小籠包、叉燒。其中叉燒更係餐廳名物，厚肉叉燒肥而不膩，鹹甜中帶香，加上少少燶邊，恰到好處。
再嚟係足料蟹粉蟹肉燕窩羮，養顏燕窩連同蟹膏蟹肉，煨煮成濃厚湯羮，啖啖甘甜。蟹粉芙蓉龍蝦球亦非常不錯，彈牙龍蝦起肉快炒，淋上蛋白、蟹粉 配上脆米窩巴，層次豐富。
戲玉在後頭，原隻五両太湖大閘蟹，最純粹嘅清蒸方法，一拆開已經見到豐腴蟹膏，濃郁鮮甜味，一食全枱都變得安靜。食大閘蟹千萬唔好淨係掛住食膏，其實蟹肉都好鮮甜，值得花心思拆。
最後奉上秋冬必備生炒臘味糯米飯，同驅寒甜品桂花薑茶紫薯水晶湯丸，天氣終於開始涼，食返碗糯米飯同薑茶湯丸暖胃，就係最perfect嘅ending啦！
本身係LANGHAM SUPPER CLUB會員，可以用每位$888元預訂優惠，十月尾前國泰會員預訂亦可享優惠$988正，畀錢時出示國泰App就賺到三倍里數，非常抵食，儲多啲里數換機票就最開心，趁呢個星期仲有優惠，唔好錯過啦！
地址：旺角上海街555號康得思酒店6樓
營業時間：星期一至五 11am-2:30pm、6pm-10:30pm；星期六、日及公眾假期 10:30am-3:30pm、6pm-10:30pm
