越嚟越多裝修揼本嘅新派中菜，最新有灣仔開業嘅永8舫，裝修花費過千萬，走現代藝術風格，淨係影相打下卡都夠靚！
雖然係豪裝，不過都唔洗嚇親，新張關係餐廳就推出咗自助早午餐（$368位 +10%），逢星期六、日及公眾假期都有得食，超過三十款美食包括點心、小菜任食，每個客人仲可享一客波士頓龍蝦同秘製天客翅。
點心賣相精緻，得意嘅兔仔餃其實係香濃奶黃餡，啤梨造型嘅鹹水角就用上西班牙黑毛豬。蝦餃、燒賣呢類點心當然唔少得，其他仲有香茜餃、流沙包、海皇卷等，小菜方面就有脆皮咕嚕肉、油爆蝦，賣相吸引，仲有惹味嘅芝士焗豬扒飯添！優惠暫時做到月尾，想食就要快！
咁靚嘅環境，不妨點返一兩杯，餐廳自設酒吧，供應一系創意cocktail，用咗茶去沖調嘅cocktail帶點中式元素。以桂花烏龍茶、荔枝調成嘅Mrs Yeung（$128），靈感原來自楊貴妃，入口香甜，比較特別仲有用普洱浸泡gin酒做嘅Twilight（$128）。
地址：灣仔軒尼詩道318號永倫立方2樓
營業時間：12pm-3pm; 6pm-11pm
