天氣真係凍咗好多啦！係時候要打邊爐！你又有冇諗過下午茶時段都可以烚下烚下？尖沙咀手工火鍋店台北‧寬巷子推出全新下午茶「雲霧嚐仙」（$598），養生湯底配上煙霧彌漫效果摩天輪下午茶架，今個冬天，可以約朋友食返個暖笠笠嘅tea！
下午茶指定招牌椰皇牛乳花膠燉雞湯，湯底浸上精緻玫瑰花狀凍湯冰塊，享用之前灑玫瑰花瓣作點綴，最後加入高湯，開始前下午茶架會加啲水，即時有噴煙效果，相當療癒！
望落份量十足嘅下午茶架，有肉類盛合，排成三朵精緻玫瑰花狀，包括澳洲和牛牛舌、墨魚片同松阪豬肉。另外仲有用豆皮卷做嘅菠菠糖，內有的豬肉、花枝、鮮蝦作餡嘅糖葫蘆，同埋以花枝漿、豬頸肉加蝦肉做嘅枝仔冰等，當然都唔少得鋪到成個花籃咁嘅蔬菜盤啦！
*下午茶需一日前預訂
地址：尖沙咀海港城海運大廈地下 OT G57舖
下午茶供應時間：3pm-5pm
