深水埗發現充滿創意嘅章魚燒店！餡料唔只係八爪魚，而係牛柳粒？呢間叫圓燒嘅小店，喺西九龍中心同福華街都有分店，賣嘅係關東風章魚燒，即係會將章魚燒燒到表面脆卜卜。店員相當有心機燒，食起嚟更加有咬口。
章魚燒嘅口味亦都充滿創意，老闆竟然諗到到牛柳粒代替八爪魚，做成一口牛燒（$26 /4粒），章魚燒入面有原粒牛柳粒，食肉獸必試。
大推明太子燒（$33）唔係就咁淋上明太子醬，而係餡料入面都有一粒粒明太子，食起嚟爽口彈牙， 十分過癮。
鍾意食香辣刺激嘅要試冬蔭功燒（$39），老闆特別將章魚燒漿調成冬蔭功味，酸辣味十足，仲有陣陣香茅香氣。餡料就用上鮮蝦同蜆肉，夠揼本，原來將冬蔭功做成章魚燒一樣work！
除咗章魚燒，小店都有賣大阪燒，仲有日式定食、小吃等，放假開出深水埗黃金、鴨記，行行下口痕醫肚就啱晒啦！
地址：深水埗福華街176號地舖
營業時間：11am-9pm
