好多文青潮人都鍾意 Weekend 去南豐紗廠打卡，逛市集、蒲Café 打卡，而家仲可以去丹丘蒸留所睇相展、試特色雞尾酒！
丹丘蒸留所係香港氈酒品牌白蘭樹下嘅試酒室，品牌一年前推出全球首支無糖咖啡甜酒「淡墨」，適逢一周年發佈聯乘特別版。「何藩先生光影作品限量版 – 威士忌桶陳淡墨無糖咖啡甜酒」用上已故攝影師何藩嘅名作「香港威尼斯」作是次特別版嘅酒標，而特別版淡墨咖啡酒嘅味道亦是與別不同。
品牌將原裝嘅咖啡酒放入美國裸麥威士忌酒桶陳化 9 個月，氈酒與咖啡嘅味道融和沉澱，更誘發了黑朱古力、蜂蜜及木香嘅風味，此特別版只限量製作 2500 瓶 ($398)，每瓶均有序號，別具收藏價值。
配合此特別版面世，品牌更於丹丘蒸留所設立何藩相展，以《夢醒之間》為主題，展出 8 幅何藩先生嘅作品，當中用上重曝方法嘅菲林照片，展現出如夢似影嘅香港景色。
而 12 月期間每逢星期五，丹丘蒸留所將推出聖誕節限定嘅雞尾酒Smoky Dreams $120，先將酒杯煙燻，就像夢境一般迷幻。雞尾酒以白蘭樹下氈酒、淡墨咖啡甜酒、薄荷及椰子味利口酒等調製，帶有像薄荷士的糖嘅清新甜味，滿溢聖誕氣氛。
地址：荃灣南豐紗廠 3 樓 301 號
展覽日期：即日至12 月 31 日，12pm – 7pm
