銅鑼灣世貿中心商場即將重開，率先在商場內開業嘅品牌有以蛋糕起家嘅 La Viña，新店室內設計呼應品牌 logo粉紅色調，配以幽淡嘅燈光、順暢嘅流線形線條及圓拱元素，充滿少女夢幻氣氛同時帶有時尚格調。
La Viña 以烘焙產品起家，芝士蛋糕堅持採用西班牙傳統食譜製作，新店當然有更多選擇，焙茶忌廉卷、士多啤梨雲呢拿蛋糕、宇治抹茶紅豆、原個 Tiramisu 等。麵包有招牌嘅蒜蓉忌廉芝士包，而新推出嘅「Sausage Skewer」（$42），串起兩個迷你嘅酥皮腸仔包，好似街頭小食咁逐啖咬開，酥皮鬆化香脆，打卡得嚟又食得滋味。
鹹味配料嘅「Savory Scone」（$32）也是全新產品，以芝士 scone 作基調再加入每日廚師精選嘅食材，細細件配一杯咖啡做早餐剛剛好。
新店亦推出多款鹹食及飲品，鹹食以酸種麵包為主，烤得香脆嘅吐司，夾着芝士、自家煙燻嘅牛肉作餡料，味道夠香濃。
飲品推介配合粉紅主題嘅 Strawberry Au Lait（熱 $46 / 凍 $48），混入士多啤梨醬嘅奶底可見顏色鮮明嘅分層，影相與味道都有大滿足！
地址：銅鑼灣世界貿易中心地下G09 號舖
營業時間：10am – 8pm
電話：9661 5106
