去東龍島白崖打卡順便環島一圈只需大半日，玩完仲有時間返市區食個晚飯。你亦可以選擇喺島上露營過夜，喺一個十分便捷嘅小島郊遊選擇！以下重點介紹 3 個必去必食嘅地點，拉到最底則有路線及資訊！
//白崖//
東龍島最著名就係最南邊嘅白崖，據聞係為咗防止船隻撞上山崖而撒上不灰粉，令岩石變成極似雪地嘅白色，喺多個角度影相都輕易打卡，如果有航拍就更壯觀。上落白崖需要手腳並用攀爬，不過未算十分險要，而且附近經常有其他遊人，因此尚算安全，但行山經驗尚淺的話，也要格外小心。
//燈塔//
離開白崖沿東龍島東邊往北，走大約一小時便可以去到燈塔位置，望到將軍澳對出海峽位置及對面布袋澳一帶嘅半島山景，燈塔旁已是海邊，如果想攀上燈塔影相要量力而為。
//合全士多//
島上有多間士多，其中最受歡迎嘅係合全，此店出品嘅紅豆少以柴火煮製，紅豆粒粒大顆香甜，有陳皮香又有起沙效果。其他茶記美食有西多士、豬扒一丁等，位置就喺碼頭附近，可選擇出出發環島前或後來填飽肚子。
//前往方法//
‧西灣河碼頭來往東龍島
西灣河開出由9am-4:40pm，東龍島開出由9:45am-5:30pm，每日共十個班次，船程約 40 分鐘，來回收費 $55。
‧鯉魚門三家村碼頭來往東龍島
三家村開出由8:20am至4:55pm，東龍島開出由8:50am至5:40pm，每日共 8 個班次，船程約 30 分鐘，來回收費 $45。
留意返，兩條航線均只於星期六、日及公眾假期提供服務。
//環島遊路線//
下船後往右轉上南堂，會見到幾間士多，在此路口轉右，進入南堂灣沿岸山徑，沿途為石屎路難度不高，約 10-15 分鐘去到分叉路口。如果時間許可，可選擇往右向觀景台睇風景，否則可靠左繼續前行。
約 10-15 分鐘後便可到達轉往鹿頸灣嘅路口，向右轉便是前往白崖嘅岸邊，離開白崖後沿路返回連接鹿頸灣嘅分叉路，跟住石屎路走上鹿頸山、南堂頂、企山頂，約 20 分鐘便到最高點嘅企山頂，高度也只是 250 米沿途為石屎路不算難走，不過沒有遮蔽要做足防曬措施。
接着向北走往南堂頭、南堂咀，約 20-30 分鐘便到燈塔，此落山路段會有山石路，初階者要小心，之後走 10 分鐘左右便可回到碼頭。島上還有鬼洞、東龍洲炮台、東龍洲石刻等景點，如果有時間的話可以睇埋更多景點。
