呢間樓上 Café 就喺銅鑼灣鵝頸橋旁邊，Café 從前係 Mamaday，早前 rebrand 成 Zip Zip 以新品牌示人，地點方便之餘驚喜處處！
由入口嘅樓梯級開始已經可以打卡，走廊貼滿帶點懷舊風格嘅玩味海報、嘲諷嘅語句，入到 café 內十分光亮舒適！而每張餐桌、每個角落都叫人眼花撩亂，字句、玩具擺設，每個位置都有特色。
打開餐牌，古靈精怪嘅玩味延續到每一版嘅版面設計，甚至菜式名字之中。雞翼嘅菜式名係「記住，期望愈大，失望愈大⋯雞翼」，洋蔥圈叫「平凡到無得再平凡嘅炸洋蔥圈」。Café 嘅菜式十分齊全，小食、甜品以外有多款主菜，Pizza、意粉、飯、肉類嘅選擇很多。
食肉獸推介「慢煮2萬8千8百秒蜜汁香茅豬頸肉」，飲品有咖啡、特飲、雞尾酒等，其中最多人打卡嘅係「提拉米蘇聽過未」($56)，將 tiramisu 變成咖啡飲品，面層嘅芝士奶泡有細滑質感。
Zip Zip 更有網上烘焙店，將自家製嘅 Madeleine 及蛋糕放在網上供客人預訂Early Grey Woven ($288 起)，裏面係伯爵茶芝士蛋糕，面層嘅鮮奶油看似針織衫般嘅質感，賣相精緻優雅。
另有外層香脆又滿有牛油香嘅瑪德蓮小蛋糕，原味之外有多款口味 ($25/件)，包括流心士多啤梨、小山園抹茶芝麻、特濃朱古力、蜂蜜檸檬、榛子牛油、伯爵朱古力，提早 2-4 日預訂即可。
地址：灣仔霎西街 28 號 1 樓
營業時間：星期日至四12pm – 10pm、星期五及六 12pm – 10:30pm
電話：2164 0066
