有冇聽過李寶龍路？呢條樓梯小路係堅尼地城嘅住宅小街，附近仲有太白臺、羲皇臺幾條小巷，就算平時會去堅尼地城逛 café、小店、海傍打卡睇日落，都未必會進走呢一帶，但地點其實就喺卑路乍街轉入去，離地鐵站出口只需 5 分鐘，就去到呢個仿似城市後花園嘅空間，附近有老樹及很多植物，氣氛寧靜雅致。
上星期呢條小路梯級旁開咗間新 café「COZE」，店內外也滿佈綠色植物擺設，門口旁邊一整面大玻璃窗，中午時分陽光穿透樹木影照到室內，聽着外邊雀仔聲，好似去咗世外桃源一樣。
食物方面選擇比一般 café 多，更似一間餐廳小館。特別推介海鮮類嘅「House Mussel」（$138），用上肥美大隻嘅藍青口，以檸檬忌廉汁及洋蔥、車厘茄等煮製，清甜細滑。酸種麵包烘得香脆卻不會乾爭爭，蘸點忌廉汁瞬間吃光光。除咗青口，另外可選雜錦海鮮番茄湯，同樣配上酸種麵包，有海蝦、帶子、魷魚、青口等，非常足料。
All Day Breakfast（$128）也令人十分滿意，牛油果、炒蛋、沙律、煙三文魚、酸種麵包、還有巴馬腿，大大份吃得飽肚。
其他菜式仲有 cold cut platter、tiramisu croffle、自家製巴斯克蛋糕等，食物水準比一般咖啡店更高，嚟飲杯咖啡之餘可以逛逛小街吸收樹木靈氣，格外舒暢。
地址：堅尼地城李寶龍路28-30 號寶龍樓 E 舖
營業時間：10am – 6pm、星期一休息
