喺西營盤水街轉入荔安里隱蔽內巷，開咗呢間設計充滿玩味嘅美式餐廳 Sir Berwick！店內嘅裝修帶有復古元素，漢堡包、雪糕筒造型凳仔、卡式帶圖案牆身設計，又播住地道嘅英文電台頻道，餐牌、海報、天花吊下嘅紙牌都寫上有趣語句，到處打卡位之餘更令用餐氣氛充滿玩樂感覺。
食物以烤芝士三文治、窩夫、漢堡包、奶昔作主打，全部都係邪惡又令人上癮！經典烤芝士三文治($78)，以烘至香脆嘅三文治夾着大量芝士，拉開全是融化又拉絲嘅芝士，配上番茄南瓜湯，食一份已十分飽肚。
鍾情窩夫必選 Berwick Waffle Set ($178)，套餐已包括炸雞及太陽蛋窩夫，配埋杏仁焦糖奶昔，另加鮮忌廉 (+$4) 更 creamy 又有奶香。
漢堡包推介和牛太陽蛋 ($138)，調味偏濃郁鹹香，跟配薯條都係重口味選擇。
地址：西營盤水街2 號荔安里荔安大廈地下 E 舖
營業時間：星期二至五 11am – 7:30pm、星期六及日 10am-7:30pm
