相信大家身邊都有朋友已經有飛返轉，未有計劃又想感受下旅行感覺，可以嚟長沙灣呢間 Lonely Paisley！佈置充滿著異國色彩，係一間用旅行做主題嘅餐廳，一入門口最搶眼，當然係幾個鋪上土耳其地毯，充滿著民族色彩嘅小木枱，畀你坐喺咕𠱸上，再加埋牆上嘅手繪圖案，一睇就知係無死角打卡位！
驟眼以為係食土耳其嘢？又唔全完係，中東、地中海、墨西哥又有啲，所以餐牌都係以異國菜做主題，推介墨西哥三重芝士雞肉餡餅/$88，配咗自家製四川麻辣醬，味道唔會話真係好係好辣，餡餅除咗芝士雞肉外，仲有啲甜椒、洋葱，增加咬口。
鍾意食海鮮嘅，可以點個泰式椰香藍青口/$138，青口嘅份量相當慷慨，用椰汁、香茅、羅勒等煮成嘅醬汁，味道香甜，同青口好夾。
飲品方面，除咗咖啡、茶，餐廳都有供應無酒精雞尾酒，呢杯用菠蘿、墨西哥辣椒做材料嘅Remember Me/$68，飲落少少辣辣地，都幾得意㗎。
同朋友坐喺地毯食下飲下傾下計，加埋可以畀大家瘋狂打卡影相嘅環境，可以過返相當寫意嘅下午，就當再次去旅行前嘅一個小預習吧！
地址：深水埗福華街182號A地下
營業時間：12pm – 10pm
