去日本如果旅遊日數較長，大多人都會預留一兩日去東京近郊。今次介紹一個地區，可以近距離影到富士山，又有充滿昭和味道嘅特色街景，街道延綿盡頭就係壯麗嘅富士山，現場見到，的確有種懾人嘅震撼！
想欣賞富士山美景，唔少人都會即時諗起河口湖。不過今次要介紹嘅係富士山腳下嘅吉田市，距離河口湖其實只係相差四個站，由新宿出發搭JR特急電車到大月站，轉乘富士急行線就可以到達下吉田站，或者早一個站月江寺落車，一樣可以步行去到。
呢個可以睇到咁靚嘅富士山街景，其實就係本町二丁目商店街，而最理想嘅拍攝位置係近日川時計店嘅十字路口，從路口旁邊望過去，就會見到成座富士山。成條街道仲保留住昭和時代氣息，舊式招牌、簷蓬令拍攝出嘅照片更具味道。不過大家要注意，本町二丁目係相當繁忙嘅街道，汽車出入頻繁，大家應該儘量留係行人路旁拍攝，而當地都有貼出告示提醒大家，避免意外發生。
影完富士山，正好發現前一個街口，就有間11月頭先新開嘅FabCafe Fuji，FabCafe其實係一個源自東京嘅品牌，喺東京、京都、名古屋 甚至世界各地都有分店，而品牌更曾經進駐香港 喺上環新街開過店。
吉田市呢間正正係品牌最新分店，對正富士山街景拍攝熱點，食物以手工輕食為主，有全日早餐、烤芝士火腿多士，亦有甘筍蛋糕、曲奇等。空間極寬闊，落地玻璃透入溫暖自然光，除咗咖啡、食物外，亦有各式藏書、選物等畀大家慢慢睇，唔趕時間真係可以hea足一個早上！
FabCafe Fuji
山梨県富士吉田市下吉田3-5-16
https://www.instagram.com/fabcafefuji/
食飽慢慢逛下成個吉田市，鍾意家品嘅可以去雜貨店LONGTEMPS，入面有賣好多精品食具，仲有日本製木傢俬，雖然未必帶到返屋企但用欣賞嘅心去睇，已經夠晒開心！
LONGTEMPS
山梨県富士吉田市下吉田3-12-54
https://www.instagram.com/longtemps_est1934/
最後介紹一間洋菓子店Toraya，店面驟眼平平無奇，入面玻璃櫃原來放滿各式糕餅，好似士多啤梨忌廉蛋糕、栗子蛋糕等，未必係好特別嘅款式，但件件精緻，每件都想買嚟試下！店舖1935年已經開業，入面嘅糕餅師傅係一位老伯伯，做出嚟嘅蛋糕入口鬆軟，仲有印咗cute爆富士山貼紙嘅雞蛋布丁呢！
Toraya
山梨県富士吉田市下吉田3-1-5
部分相片from 富士吉田市觀光指南
