牛扒加薯條實在係冇得輸！靚牛200蚊唔洗任食薯條，更加係抵！講緊係位於深水埗嘅港式扒房Supreme Steak & Grill，餐廳唔算好起眼，原來內藏優質靚扒！
老闆本身係個愛好牛扒狂迷，除咗積極搜羅靚夾唔貴嘅牛扒之外，仲入埋酒店級扒爐，誠意十足。餐廳最抵食一定係晚市扒餐，90分鐘任食薯條，最平$135就有 A4和牛漢堡，扒類亦唔局限於牛扒，仲有豬鞍、魚扒、羊架可以揀。
牛扒首推安格斯封門柳（$190）肉質軟嫩，肉味夠香濃，點埋個自家製黑胡椒汁，香辣惹味。羊架就用紐西蘭貨，有羊味得嚟唔羶，而魚就有比目魚扒，油脂豐富夠滑溜。
任食薯條係用幼身薯條，炸得夠香脆，順帶讚下小食印第安烤無激素雞翼（$40），大大隻夠肥美，烤得香口惹味，最緊要係佢全日都冇加一，係抵喎！
地址：深水埗福榮街161號永邦樓地舖
營業時間：12pm-10pm
