美式漢堡店 FIVE GUYS 再度開設新分店，香港第 9 間分店進駐九龍塘又一城！FIVE GUYS 其中一個特色就係無特定配料嘅款式，客人只需選擇漢堡、芝士漢堡、烤芝士三文治等主要餡料，然後便可免費挑選15款配料，包括生菜、煎炒洋蔥、墨西哥辣椒、牛扒醬等。以為就此配搭好簡單？原來仲有隱藏特式食法！
「生菜漢堡包」可以要求將兩片麵包改成生菜，夾住芝士、牛肉及各式餡料，呢款低碳配搭仲適合生酮人士。另一款特式食法係反轉個漢堡包，將平常煎至香脆那一面反向上，食落更能保持香脆口感。
嚟到當然仲要食薯條，觀塘店開幕時曾創下一日賣一千份 regular size 薯條嘅紀錄。薯條香脆、味濃，原來係每日手切，經過嚴謹嘅洗除澱粉程序，確保薯條粗幼度及脆口質感保持水準。而店內會寫上每日薯仔來源地，最近就選用荷蘭出產嘅薯仔，大件又香薯仔味。
飲品方面當然要試奶昔，同樣係任選配料嘅方式，可選士多啤梨、香蕉、焦糖等等，更透露下年將推出 lotus biscoff 焦糖餅口味，值得期待啊！
地址：九龍塘又一城 L2 43-45 號舖
