鍾意食貝果(Bagel)嘅朋友，就一定要嚟新蒲崗嘅貝果專賣店玖拾！本身已經係人氣焙烘網店早前就開設呢間實體店，供應多款夾心Bagel同歐式麵包，包保令你花多眼亂！
自問有選擇困難症的話，入到店舖的確會有啲痛苦，皆因無論係Bagel定麵包，都有十數款畀你揀，而且口味特別又吸引，分幾次買嚟試一啲都唔過份。
Bagel首推抺茶紅豆麻糬/$32嘅麻糬夾心十分軟滑，即使係第二日烘返熱嚟食都唔乾，配上煙韌嘅抺茶Bagel同微甜紅豆餡，食落口感豐富、好滿足！
雙重朱古力麻糬/$32 同三重芝士/$29都係唔錯選擇。前者朱古力味夠香濃，一樣配有軟滑麻糬，後者就藏有原粒芝士，各有特色。其他特別口味仲有台式鹹蛋肉鬆、伯爵奶酥、乳酪夾心等等。
除咗Bagel，歐式麵包一樣做得出色，好似紫薯麻糬、芋泥鹹蛋黃奶酥小吐司等。特別推介芋泥黑糖麻糬/$18，麵包部份做得好軟熟，內藏黑糖麻糬同厚厚嘅芋泥，味道唔會太甜。細食嘅朋友，加杯野飲當lunch都仲得！
地址：新蒲崗景福街 63 號地舖
營業時間：星期二至日 8am-8pm
