製作公開！Café Revol嘅卡邦尼意粉唔少客人、甚至 KOL 都讚不絕口，睇見佢嘅色澤又的確係與別不同，原來係用咗日本蛋「曉」，而且製作過程冇加任何忌廉、牛奶、甚至牛油，幾乎係100%食緊日本蛋濃郁嘅味道，質感亦特別稠身。
呢個卡邦尼意粉嘅食譜由大廚與老闆合力研發，首先用咗兩種煙肉，分別係風乾豬面頰肉及厚身嘅煙肉，只靠煙肉嘅油脂起鑊不加其他油，再加入意粉及自家煮製嘅高湯，然後直接倒入曉蛋嘅蛋汁。加蛋汁時要快速移動意粉及平底鑊，先可以避免蛋汁過熟，而且令蛋汁、意粉及高湯混為一體。
上碟嘅時候額外加一隻曉蛋蛋黃，食嘅時候弄穿蛋黃質感更加濃稠。除咗呢一款經典口味，咖啡店最近悄悄推出加辣版本，只有熟客先會識得order，撒上大量辣椒粉以及黑椒，淡淡辛香更有層次。
如果鍾意食炒蛋就有更多菜式要試，炒滑蛋同樣不加忌廉牛奶或牛油，只用曉蛋嘅蛋汁炒到滑溜 creamy。除咗常見嘅全日早餐日可以食到呢個炒滑蛋之外，早餐仲有滑蛋豬柳漢堡，或者係配慢煮雞胸等嘅主菜選擇，絕對係蛋控嘅天堂。
飲品方面除咗一般咖啡，最新推出嘅飲品有店主親自煮製嘅冰糖燉檸檬，非常滋潤，一般嘅咖啡拉花都有可愛圖案，好啱打卡。
地址：佐敦德成街 4-16 號容裕臺地下 5 號舖
營業時間：星期一至六 8am-6pm，星期日及公眾假期 9am-6pm
電話：3702 0170
